واخيرا بدات تظهر ملامح بعيده للشتا وينتهى الصيف...انا بحب الخريف والشتا اوى...فاكره مره وانا فأعدادى طلب مننا المدرس نرسمله عيد من الاعياد..فيه اللى رسم العيد الصغير وشم النسيم وغيره..انا رسمت شجره فيها شويه ورق اصفر والباقى مرمى على الارض..استغرب وقتها من رسمتى وانا كنت مقتنعه انه عيد...ولحد دلوقت بحبه... بحس فالشجره و ورق الشجر الاصفر بحاجه مش عاوزه اكلم عنها لانها تتحس...حاسه القلم غريب فايديا..كأن لسه بنتعرف على بعض..وحشنى بجد..حبيت انهارده احكى فجيتلك ...توريني حروفى وطريقى...
حابه اكلم عن حاجتين..الاولى ..وبقيت ويب دزينر...
ابتدت القصه من درس الفرنساوى فى اولى ثانوى ايامها كنت بحب اتعرف على كل الناس وبضحك وبتنطط زي الاطفال من غير زي :D...شدتنى بنت اسمها هبه...حسيت من اول نظرة انها هيكونلها مكان فدنيتي الجايه...وبقينا صحاب اوى ...واول مره اخرج كان معاها...كانت ايام حلوه وبريئه...كان فيه شارع متعودين نمشى فيه اللى فيه مدرستى بتاعت ثانوي اسمه المختلط..وكنا بنطلع نقف على النيل قدام كوبرى القطر وساعت الغروب دايما بيكون فيه قطر بيعدي..وصوت كروان...كأن بينهم ميعاد...ولحد دلوقت لما الدنيا بتضيق بيا اوى او بفرح اوى بمشى هناك لوحدى...
المهم...فالفتره دى كان كل حد عاوز يطلع حاجه...اللى عاوز يبقا دكتور يامهندس يامدرس...انا كنت عاوزه اخش تربيه طفوله او اداب واقعد فالبيت :D:D...ونعم الطموح :D:D...مكنش فدماغى حاجه...وكتبت ادبى... وهبه صحبتى دخلت علمى رياضه..وحولت فى اخر وقت عشان اكون معاها لانى بحبها ...وقولت اخش اى حاجه ...وانا وهيا بنحب الرياضه..كانت بتحلم تخش هندسه اسكندريه عشان بالعربى وشاركتها حلمها وكنا بنقول هنقعد فبيت على البحر لاننا بنحب البحر أوى..فتانيه ثانوي كنت برجع من كل امتحان وانا حاسه انى مش هنجح ...مكنتش اصلا بذاكر...على رأى بابا ربنا يرحمه كنت ومازلت حراميه معلومات :D...
وجت النتيجه وجبت تسعين فالميه مش عارفه ازاى!...كملت تالته بس للاسف لوحدى:(..من وقتها اتعلمت امشى لوحدى...كنت لما بضايق بقعد احل رياضه..كنت بحب الرياضه والبلاغه وادب تالته اوووى...وكنت مش بحب الفيزيا ...بس فالآخر اتصاحبنا ...عملنا معاهده سلام لحد مااخلص منها :D...
وجت النتيجه وغير متوقعه بردوا باين كانت فى تالته خمسه وتسعين ولاحاجه شبه كدا ... انا فاكره انى فرقت على هندسه بورسعيد حاجه من عشره بس مفكرتش فيها اصلن
مقدرتش اكمل بالقلم وجعلى ايديا اوى :D
ايامها كانت معلوماتى عن الكمبيوتر زي معلوماتى عن الكوره كدا ويمكن العن :D...على الاقل انا فالكوره بعرف جوووووووووووووووووووووووووون :D:D:D...فكرت اخش تربيه طفوله بس وقتها كانت رياضه اتنين شويه دخلت راسى وحسبتها ان حاسبات لسه فاتحه مستقبلها احسن واستخسرت المجموع بصراحه وماما لو كنت قولتلها اخش تربيه طفوله مش عارفه الصراحه كانت هتعمل ايه :d...ودخلت حاسبات ومكنتش حاباها خالص...بس بالوقت والصحاب حبيتها اوى واستغربت ازاى فيوم اتقفلت منها...واتعرفت على امل كانت معايا فثانوي بس اتصاحبنا فالكليه كنت بحبها اوى ... وجه التخصص تالته ورابعه اخترت اى اس عشان اريح دماغى ...بس القدر خلانى احول فاخر دقيقه لسى اس كالعاده يعني :D...وحولت سى اس ولو رجع بيا الزمن كنت هخش بردوا سى اس رغم انه اصعب بس كنت هستمتع بالمواد اكتر من كدا ... مكنتش بذاكر بردوا :D...جه الترم الاول فرابعه شلت ماده بالعربى وسهله اوى وكان باقى المواد جايبه تقديرات وكان فيه امتياز وجيد جدا مش عارفه دي ازاى...وقتها زعلت اوى بس حاجه من ربنا حسسني ان دا خير..عملت تظلم ولما عرفت ان مفيش فايده مزعلتش الحمدلله..كنت حاسه ان دا خير وفعلا خير اوى...وبقيت دور نوفمبر :D...كان طول الكليه شاددنى البرمجه اوى...واخدت كورسات وكنت بذاكر كمان لوحدى..كنت بستمتع بالبرمجه زي الرياضه كدا...بالنسبالى حاجه للمزاج مش للمذاكره...واتحولت بين سى شارب وجافا وسى شارب تانى ...وقعدت فالبيت ولان معرفش مكان جافا فالمنصوره فقولت اكمل السى شارب واعرف ايه اس بي..بس قعدت فالبيت وكسلت بقا...وجالى اختيار بعد فتره... بين حاجه كدا دكتور عندنا عاملها بتجمع بين برمجه ونظم ومحاسبه فواحد وويب ديزين ...وانا اصلا ماليش فالنظم ولا ليا فالدزين لعبت شويه فتانيه على الفوتوشوب بس مكنتش بعرف اعبر عن اللى حساه فالصور...صليت استخاره وكملت فالدزين..وجت ظروف صعبه عليا وفاه بابا وتعبه حاجات عمرى ماهنساها ربنا يرحمه يارب ويغفرله ويونسه فى وحدته ويجعل قبره روضه من رياض الجنه وارضى عنه يارب وارحــــــمه...يارب ...بعد ماكنت خلاص انطويت وبعدت عن كل الناس وصحابي..تقريبا قعدت حوالى اربع شهور مشوفتش الشمس بره بيتنا...روحت صناع وروحت ادور على تدريب ...وانا مش حاطه فدماغى انى هتقبل قولت اجرب عشان بابا...اتقبلت وكان الراجل مبسوط منى اوى وكان بيقنعنى اكمل برمجه وكان عاجبه دماغى اوى...وفكرت اكمل برمجه وحجزت كورس بس اتكنسل فكملت الدزين ...واتعلمت فالتدريب حاجات حلوه..وكان روح البنات والسنيور هناك حلوه اوى..بفتقدهم جدا...المفروض مده التدريب تلت شهور انا تقريبا روحت خمسه ...بس كنت بغيب كتير..كنت بدات افقد الامل انى اشتغل فالشركه وكان فيه منحه فوزاره الاتصالات وكنت اخدت كورس انجلش وكان المفروض امتحن اى سى دى ال بس حسيت انى مش عاوزه التزم بمواعيد ومنحه هتخنق انا عاوزه اكون حره..جالى شغل فى شركه كبيره بالنسبه للمنصورة اسمها ايجيبت نت ورك..وكان مطلوب حاجه تتعمل بالنسبالى سهله اوى ..فنفس الوقت دا عرفت من السنيور ان انا على الويتنج ليست وانى ممتازه وان لو اى مكان فاضى هشغله وجالى شغل تانى ..روحت المكان التانى وبعدها جالى فالشركه دي تانى بس كنت التزمت ومكنش ينفع اسيبهم فالاول ...وبعد شويه اتزنقنا فى بى اتش بى اتعلمته...
وبقيت ويب دزينر وبى اتش بي وانا اخر شغلانه ممكن انفعها فالدنيا الدزين لانى مبعرفش اعبر عن اللى جوايا اصلا ... حاسه انى فيوم هشتغل حاجه تانيه بعيده عن المجال دا ...معرفش ايه هيا بس فيوم هعرفها وهحبها...ولسه بردوا لو حد من صحابى دخل حاجه هخشها معاه واشاركه متعتها ومش ندمانه :D
احم احم داانا رغاااااااااااااااااااااايه اوى :D:D:D
تانى حاجه حابه اكلم عنها شويه احلام متنتورة:
1.نفسى اتعلم كمانجا .
2.نفسى امشى على البحر قبل الشروق بساعه واشوف الشروق والغروب هناك.
3.نفسى اتعلم اركب عجله وافرد ايديا واقف واحس بالهوا بيلمس خدودي وكأنى طايره...انا نفسى اطير...يمكن لو كان ينفع اكون حاجه تانيه كنت اخترت اكون بجناحات مفرودين وطــــــايره.
4.نفسى اشرب حلبسه على النيل بليل فعز الشتا بليل اوى واكل بعدها ايس كريم متلج :D.
5.نفسى اضحك من قلبى فيوم.
6.نفسى احس بالحريه .
7.نفسى اتبنى طفل اربيه ولو غنيه اوي نفسى ابنى بيت لاطفال الشوارع بيت مش ملجأ بيت كبير يكون دفااااااا لينا قبل ليهم احساس الامان بيقولوا حلو اوي :).
8.نفسى امممممممممم نفسى بقا اروح جزيره كل اللى فيها طبيعي مفيش ايد انسان لمستها وفيها خضره وشلال وزهووووووور الوانها حلوه واحصنه من غير لجااااام بتجرررررررى.
9.نفسى امممممم اكل فول من عربيه فشارع المديريه كان لما الاوتكار يفوتنى وانا صغيره ماما توديني المدرسه وكنا بنعدي من جنبه كانت ريحته حلوه اوى ..دافيه فعز الشتا ..بس ياترى لسه موجود!
10.نفسى فحاجه مش عارفه ايه هيا :D
فيه كمان بس دا اللى فكراه دلوقت :D
ياه كتبت كل دا :D:D
